د معمار پرس د خبر له مخې؛ د چین او پاکستان ځانګړو استازو، چې د شنبې په ورځ کابل ته سفر وکړ، د طالبانو د صنعت او سوداګرۍ وزیر نورالدین عزیزي سره په ګډه غونډه کې د افغانستان، چین او پاکستان ترمنځ د اقتصادي همکارۍ او سوداګریزو اړیکو د پیاوړتیا په اړه بحث او نظرونه تبادله کړل.
د پاکستان ځانګړي استازي صادق خان اعلان وکړ چې په دې غونډه کې موافقه وشوه چې د چین-پاکستان اقتصادي دهلیز افغانستان ته وغځول شي.
د دې دهلیز هدف په سیمه کې د سوداګرۍ او اقتصادي پراختیا اسانتیا برابرول دي.
دا غونډه د چین او پاکستان د استازو ترمنځ د طالبانو د بهرنیو چارو وزیر امیر خان متقي سره د پخوانیو غونډو په تعقیب وشوه، چې په کې اقتصادي، سیاسي او سیمه ایزو مسلو خبرې وشوې.
