د معمار پرس د خبر له مخې؛ ملګرو ملتونو په یوه نوي راپور کې خبرداری ورکړی چې افغانستان د امنیتي او اقتصادي کړکېچونو سربیره، اوس د اقلیم د بدلون له امله د مخ په زیاتیدونکي ګواښونو سره مخ دی. داسې کړکېچ چې اغیزې یې د دې هیواد د خلکو په ورځني ژوند کې په محسوس ډول څرګندې شوې دي.
د ملګرو ملتونو د راپور له مخې، که څه هم افغانستان د شنو خونو ګازونو د اخراج له پلوه په نړۍ کې لږ ونډه لري، خو د دې بدلونونو د پایلو په وړاندې یو له خورا زیان منونکو هیوادونو څخه ګڼل کیږي.
د وچکالۍ زیاتوالی، د اوبو د سرچینو کموالی، د هوا ککړتیا، او د چاپیریال بې ثباتي هغه ګواښونه دي چې د میلیونونو افغانانو د خوړو خوندیتوب، ژوند او حتی ژوندي پاتې کیدل یې له خطر سره مخ کړي دي.
ملګرو ملتونو خبرداری ورکړی چې دوامداره وچکالي او د اقلیم بې ثباتي کولای شي په هیواد کې په ملیونونو خلک د لوږې، بې ځایه کیدو او سختې بې وزلۍ سره مخ کړي.
د اوبو سرچینو کې د پام وړ کمښت، په ځانګړې توګه په کلیوالي سیمو کې، کولای شي ټولنیز تاوتریخوالی او پراخ بشري بحرانونه رامینځته کړي.
