د معمار پرس د خبر له مخې؛ سبا (دوشنبه، د ثور لومړي ورځ)، د قزاقستان جمهوریت څخه یو لوړ پوړی پلاوی، چې مشري یې د دغه هیواد د صدراعظم مرستیال او د اقتصاد وزیر سیرک جمانګارین کوي، کابل ته راځي.
د ازرنیوز په وینا، دا سفر به د ثور تر ۳مې پورې دوام وکړي، او ټاکل شوې ده چې د قزاقستان پلاوی به د طالبانو د سرپرست حکومت له یو شمېر چارواکو سره وګوري او خبرې اترې وکړي.
د دې سفر سره په ورته وخت کې، په کابل کې به د قزاقستان د صادراتو وړتیاوو معرفي کولو لپاره یو ځانګړی نندارتون هم جوړ شي.
په دې نندارتون کې به له ۴۰ څخه زیات قزاقستاني شرکتونه د خوړو، درملو، مصرفي توکو او ساختماني موادو په برخو کې خپل محصولات او خدمات نندارې ته وړاندې کړي.
