د معمار پرس د خبر له مخې؛ په یوه پیغام کې چې د شنبې په ورځ (د حمل ۳۰مه) خپور شو، ملګرو ملتونو یو ځل بیا په افغانستان کې د نجونو د زده کړې د لاسرسي پر حق ټینګار وکړ او د ښوونځیو څخه د ملیونونو نجونو د محرومیت د پای ته رسولو غوښتنه یې وکړه.
د ملګرو ملتونو په پیغام کې راغلي: “زده کړې ته لاسرسی یو بشري حق دی. خو، په افغانستان کې په میلیونونو نجونې اوس مهال ښوونځي ته له تګ څخه محرومې دي. دوی ته باید اجازه ورکړل شي چې زده کړه وکړي، خپل بشپړ ظرفیت ته ورسیږي، او د خپل هیواد په راتلونکي کې رول ولوبوي.”
دې سازمان د نجونو د استعدادونو د ودې او د افغانستان په پرمختګ کې د هغوی د ګډون لپاره د تعلیمي خنډونو د لرې کولو اړتیا هم په ګوته کړه.
خو ملګرو ملتونو په خپل پیغام کې د دې کړکېچ د حل لپاره د اقدام کولو پر بیړني اهمیت ټینګار کړی دی.
