د معمار پرس د خبر له مخې؛ پخواني ولسمشر حامد کرزي د سې شنبې په ورځ (د حمل ۲۶مه) له پاکستان څخه د افغان کډوالو د جبري ایستلو او د هغوی سره د ناوړه چلند د راپورونو په غبرګون کې، د پاکستان له حکومت څخه وغوښتل چې له افغان کډوالو سره د ښه ګاونډیتوب او نړیوالو معیارونو سره سم چلند وکړي.
کرزي په خپل رسمي پاڼه کې د ایکس ټولنیزې شبکې پر مخ د پاکستاني پولیسو له خوا د افغان کډوالو سره د ناوړه چلند په اړه خواشیني څرګنده کړه او ویې ویل: “د افغان کډوالو سره ناوړه چلند د انساني ارزښتونو او ښه ګاونډیتوب پر ضد دی.”
هغه همدارنګه په نړیوالو سازمانونو او ملي سوداګرو غږ وکړ چې افغانستان ته د راستنیدونکو کډوالو سره همکاري او مرسته وکړي.
کرزي هیله څرګنده کړه چې د کډوالۍ اصلي عوامل، په شمول د نجونو پر زده کړو بندیز، به له منځه یوړل شي ترڅو افغان وګړي اړ نه شي چې خپل هیواد پریږدي.
