د معمار پرس د خبر له مخې؛ د امریکا د ولسمشر ځانګړي استازي سټیف ویټکاف اعلان کړی چې د ډونالډ ټرمپ او ولادیمیر پوتین ترمنځ د اوکراین په جګړه تمرکز شوې ټیلیفوني خبرې به راتلونکې اونۍ ترسره شي.
ویټکاف له سي این این سره په یوه مرکه کې وویل: “زه تمه لرم چې په راتلونکو ورځو کې به د دواړو ولسمشرانو ترمنځ مستقیم تماس وي. موږ به له ښکېلو خواوو سره، په ځانګړې توګه له اوکراینیانو سره مشورې ته دوام ورکړو.”
هغه په مسکو کې له روسي چارواکو سره خپلې وروستۍ خبرې اترې هم مثبتې و ارزولې او هیله یې څرګنده کړه چې دا خبرې اترې به د جګړې د پای ته رسولو په لور جدي پرمختګ ته لار هواره کړي.
