د طالبانو مشر خپلو قوماندانانو ته لوکس موټرونه ډالۍ کړل

د معمار پرس د خبر له مخې؛ ځايي سرچینو د دوشنبې په ورځ (د دلو ۱۵مه) تایید کړه چې د طالبانو مشر هبت الله اخوندزاده خپلو یو شمېر قوماندانانو او نږدې ملګرو ته نوي موټرونه ډالۍ کړي دي. د ترلاسه شویو معلوماتو له مخې، شاوخوا ۵۰ طالب قوماندانانو دا موټرونه ترلاسه کړي دي. پورته ذکر شوي موټرونه له دوبۍ څخه اخیستل شوي وو او بیا افغانستان ته لیږدول شوي وو. ویل کیږي چې ډیری دا موټرونه هایلکس موټرونه دي، چې د طالبانو تر کنټرول لاندې سیمو کې د جنګي او قوماندې موټرو په توګه کارول کیږي. طالبانو تر اوسه په دې اړه څه نه دي ویلي.