اردوغان: د ملګرو ملتونو عمومي اسامبله باید د اسراییلو د بریدونو د بندولو لپاره له زور څخه کار واخلي

د ترکیې ولسمشر رجب طیب اردوغان وویل: که چیرې د ملګرو ملتونو امنیت شورا په لبنان او غزې باندې د اسراییلو د بریدونو مخه ونه نیسي، د دې سازمان عمومي اسامبله باید د ۱۹۵۰ کال د تصویب شوي پریکړه لیک سره سم د “زور” کارولو څخه کار واخلي. رجب طیب اردوغان د دوشنبې په ورځ د میزان ۹ مه په انقره کې د هیواد د کابینې تر غونډې وروسته وویل: “که چیرې د امنیت شورا د اړینې ارادې په ښودلو کې پاتې راشي، د ملګرو ملتونو عمومي اسامبله باید ژر تر ژره د ځواک کارولو واک پلي کړي، لکه څنګه چې د سولې لپاره د ټلوالې د ۱۹۵۰ پریکړه لیک سره ترسره شوی.” بریتانیا، چین، فرانسه، روسیه او امریکا د ملګرو ملتونو د امنیت شورا دایمي غړي دي. د ترکیې ولسمشر دا هم ویلي، چې دی په دې خفه دی، چې اسلامي هېوادونه د اسرائیلو د بریدونو د مخنیوي لپاره فعال دریځ نه اخلي.