د طالبانو د کډوالو چارو وزارت سرپرست د خلکو د ستونزو پر هواري ټینګار وکړ

د معمار پرس د خبر له مخې؛ د مهاجرینو او راستنیدونکو چارو وزارت سرپرست خلیل الرحمن حقاني د پکتیا ولایت له قومي مشرانو سره په کتنه کې د دې سیمې د خلکو د ستونزو په حل او د بېلابېلو قومونو ترمنځ د یووالي او همغږۍ پر پیاوړتیا ټینګار وکړ. په دې کتنه کې د شواک ولسوالۍ قومي مشرانو د مهاجرينو د ستونزو د حل په برخه کې د مهاجرينو د وزارت د هلوځلو قدرداني وکړه او د دغې ولسوالۍ د خلکو ستونزو ته يې د زياتې پاملرنې غوښتنه وکړه. د کډوالو چارو وزارت سرپرست هم د قومي مشرانو د نظریاتو او وړاندیزونو په اورېدو سره د خلکو د ستونزو د حل او د کډوالو د وضعیت د ښه والي په برخه کې پر خپلې ژمنې ټینګار وکړ. دغه ناسته د حکومت او خلکو ترمنځ د مثبت تعامل او په سیمه ییزه کچه د ستونزو د حل لپاره هڅې ښیي.