به گزارش خبرگزاری معمار، شوکت میرضیایف، رئیس‌جمهور اوزبیکستان، در حاشیه یک نشست بین‌المللی سرمایه‌گذاری، با نورالدین عزیزی، وزیر صنعت و تجارت طالبان، دیدار و گفتگو کرد.
دفتر ریاست‌جمهوری اوزبیکستان اعلام کرده که در این دیدار، طرفین روی گسترش همکاری‌ها در زمینه‌های تجارت و اقتصاد، حمل‌ونقل و لوجستیک، انرژی، زراعت و استخراج مواد معدنی گفتگو کرده‌اند. به گفته مقام‌های اوزبیک، این همکاری‌ها می‌تواند نقش کلیدی در رشد منطقه‌ای و اتصال افغانستان به بازارهای آسیای میانه داشته باشد.
نورالدین عزیزی به هدف شرکت در کنفرانس بین‌المللی سرمایه‌گذاری به شهر تاشکند، پایتخت اوزبیکستان، سفر کرده بود. در حاشیه این نشست، او با لذیز قدرتوف، وزیر سرمایه‌گذاری، صنعت و تجارت اوزبیکستان، دیدار کرد و دو طرف موافقت‌نامه تجارت ترجیحی و پلان عمل همکاری‌های مشترک میان افغانستان و اوزبیکستان را امضا کردند.
براساس بیانیه وزارت صنعت و تجارت حکومت طالبان، این اسناد در راستای کاهش موانع تجاری، تسهیل روند صادرات و واردات و فراهم‌سازی زمینه بهتر برای دسترسی تاجران به بازارهای دو کشور تهیه شده است.
در حالی‌که اوزبیکستان از جمله کشورهای همسایه‌ای است که روابط دیپلوماتیک و اقتصادی با حکومت طالبان برقرار کرده، اما مانند دیگر کشورهای جهان، تا کنون دولت طالبان را به گونه رسمی به رسمیت نشناخته است.
